ដោយ៖ សុវណ្ណ
រតនគិរី: មានករណីបាក់រណ្ដៅរ៉ែត្បូងសង្កត់លើកម្មករម្នាក់បណ្ដាលឲ្យស្លាប់នៅក្នុងរណ្ដៅដីរ៉ែត្បូងមួយកន្លែងនៅស្រុកលំផាត់ កាលពីវេលាម៉ោង១១ថ្ងៃត្រង់ ថ្ងៃទី៣០ខែធ្នូឆ្នាំ២០២៤ នៅចម្ការឈ្មោះម៉ៅ មឿន តែប្រធានមន្ទីររ៉ែនិងថាមពលខេត្តរតនគិរីថាអត់ទាន់បានដឹងនៅឡើយទេ។
កម្មករដែលបាត់បង់ជីវិតនោះមានឈ្មោះខាត់ សួង ភេទប្រុស អាយុ២៤ឆ្នាំ ជនជាតិទំពួន មានទីលំនៅ ភូមិចងរ៉ា ឃុំបាតាង ស្រុកលំផាត់ បច្ចុប្បន្នក្រុមគ្រួសារបានរៀបចំទុកដាក់តាមប្រពៃណី។ ប៉ុន្តែរឿងនេះម្ចាស់ចម្ការនិងកុងសែដែលជាប់ពាក់ព័ន្ធ មិនបានទទួលខុសត្រូវនោះទេ។ ដោយឡែក ប្រធានមន្ទីររ៉ែនិងថាមពលខេត្តរតនគិរី លោកអ៊ុង ហួរ បានបញ្ជាក់ឲ្យដឹងតាមទូរសព្ទថា៖ គេលួចជីករ៉ែត្បូងនោះ លោកអត់ទាន់បានដឹងទេ បើអ្នកកាសែតដឹង ជួយជូនលោកទៅមើលផង ហើយបើមានករណីស្លាប់កម្មករមែន ម្ចាស់ដីចម្ការជាអ្នកទទួលខុសត្រូវចំពោះមុខច្បាប់។
ប្រភពពីកន្លែងកើតហេតុ បានដឹងថា៖ ថ្មីៗកន្លងមកនេះ មានកុងសែមួយចំនួនបានទៅបំផុសឲ្យប្រជាពលរដ្ឋជនជាតិដើមភាគតិចទំពួន ដែលមានជីវភាពខ្វះខាត ឲ្យចូលរួមជីករណ្ដៅដី ដើម្បីរុករករ៉ែត្បូងមិនស្របច្បាប់ នៅចំណុចចម្ការចន្ទី ឈ្មោះម៉ៅ មឿន ស្ថិតនៅក្នុងភូមិសាស្ត្រស្រុកលំផាត់ ដោយរកត្បូងលក់ឲ្យពួកកុងសែជិត១ឆ្នាំគឺពុំរំខានដល់សមត្ថកិច្ចនិងអាជ្ញាធររ៉ែនិងថាមពលខេត្តរតនគិរីនោះទេ រហូតបង្កឲ្យមានគ្រោះថ្នាក់ដល់ស្លាប់កម្មករម្នាក់ទៀតក៏ប្រធានមន្ទីររ៉ែនិងថាមពលខេត្តនៅតែថាអត់បានដឹងជាដដែល។
ស្ត្រីវ័យអាយុ២៣ឆ្នាំ ឈ្មោះកាដា ត្រូវជាប្រពន្ធនៃសពកម្មករនោះ បានអង្គុយយំនៅក្បែក្ដារមឈូសប្ដី រួចរៀបរាប់ទាំងអួលដើមកថា៖ ដោយជីវភាពខ្វះខាត ទើបប្ដីរបស់នាងខ្ញុំបានបង្ខំចិត្តធ្វើជាកម្មករ ជីករុករករ៉ែត្បូង ក្រែងបានត្បូងលក់បានប្រាក់ខ្លះដោះស្រាយការចំណាយប្រចាំថ្ងៃនិងសម្រាប់ឲ្យកូនទៅរៀននឹងគេ។
ប្រពន្ធជនរងគ្រោះ បានបន្ដឲ្យដឹងទៀតថា: ប្ដីខ្ញុំបានផ្សងព្រេងជីករ៉ែត្បូងជិតមួយឆ្នាំមកហើយ។ តែពុំដែលបានជួបត្បូងគ្រាប់នោះទេ គឺបានតែត្បូងតូចៗ ហើយគាត់ខំប្រឹងជីកតាមរ៉ែ រហូតដល់ជម្រៅជាង ៨ ម៉ែត្រ បណ្ដាលឲ្យដីនៅផ្នែកខាងលើក៏បាក់ស្រុតចុះសង្កត់គាត់បណ្ដាលស្លាប់ភ្លាមៗនៅក្នុងរណ្ដៅរ៉ែនោះតែម្ដង។
ភ្លាមនោះដែរ កម្មករក្រុមផ្សេងៗទៀតបានរួមគ្នាធ្វើការកាយអាចម៍ដីចេញ ដោយប្រើរយ:ពេល២ម៉ោង ទើបយកជនរងគ្រោះបាន តែវាហួសពេលទៅហើយ ។
ប៉ូលិសមូលដ្ឋានបានចុះទៅធ្វើការត្រួតពិនិត្យ រកឃើញថា៖ ករណីកម្មករនោះពិតជាស្លាប់នៅក្នុងអណ្ដូងរ៉ែត្បូងមែន ។ ក្រោយពិនិត្យរួចបានធ្វើកំណត់ហេតុ ប្រគល់សពឲ្យទៅសាច់ញាតិដើម្បីយកទៅធ្វើបុណ្យតាមប្រពៃណី។
គួរកត់សម្គាល់ដែរថា៖ កាលពីខែកញ្ញាឆ្នាំ២០២៣ កន្លងមកនេះ ក៏មានករណីបាក់រណ្ដៅរ៉ែត្បូង សង្កត់លើកម្មករស្លាប់ម្នាក់ដែរនៅស្រុកបរកែវ លុះមកដល់ខែធ្នូឆ្នាំ២០២៤ ក៏មានកម្មករជីករ៉ែត្បូងស្លាប់ម្នាក់ទៀតនៅទីតាំងខាងលើ ។ នៅរាល់ការបាត់បង់អាយុជីវិតកម្មករជីករ៉ែត្បូងអត់មានច្បាប់នោះ តែងតែបណ្ដោយឲ្យស្លាប់ដោយអាណោចអាធ័ម គឺពុំមានម្ចាស់ចម្ការឬកុងសែណាម្នាក់ចេញមុខទទួលខុសត្រូវនោះទេ ជាក់ស្ដែងមានករណីដូចខាងលើនេះស្រាប់។
គេដាក់ការសង្ស័យថា:រឿងខាងលើនោះភាគច្រើនបានផ្ដើមចេញពីកុងសែទិញត្បូងមួយចំនួននៅខេត្តរតនគិរី ទៅគប់គិតជាមួយមន្ត្រីជំនាញ រួចកុងសែទៅបំផុសឲ្យពលរដ្ឋដែលមានជីវភាពខ្វះខាត និងពុំមានជំនាញជីករ៉ែត្បូង ឲ្យចូលរួមផ្សងព្រេងជីករុករករ៉ែត្បូងជម្រៅរាប់សិបម៉ែត្រ ដល់ពេលជួបឧបទ្ទវហេតុបាត់បង់ជីវិត កុងសែនិងម្ចាស់ចម្ការ តែងគេចវេះមិនទទួលខុសត្រូវ ទុក្ខសោកនោះបានធ្លាក់ទៅប្រពន្ធនិងកូនបានក្លាយជាក្មេងកំព្រា រស់នៅកណ្ដោចកណ្ដែងគ្មានទីពឹង។
ដើម្បីបញ្ចប់ហានិភ័យនេះ មន្ត្រីរ៉ែនិងថាមពលខេត្តរតគិរី ជាពិសេសក្រសួងរ៉ែនិងថាមពល ត្រូវតែមានវិធានការច្បាប់ឲ្យបានតឹងរ៉ឺងបំផុត បើពុំដូច្នោះទេ កម្មកររ៉ែត្បូងខុសច្បាប់ទាំងនោះអាចនឹងប្រឈមការបាត់បង់ជីវិតជាបន្ដទៅទៀតហើយ៕
